基利安麦巴比同巴黎圣日耳门嘅合约季尾就会完，佢嘅下季去向自然成为焦点，据报PSG为咗留住佢，除咗出动「肥约」外，仲谂住畀埋队长佢做，希望用诚意打动依名法国球星留队。

根据西班牙《队报》报道，PSG目前仍未放弃同麦巴比续约，当中球队董事会甚至提出由麦巴比，取代巴西籍後衞马昆贺斯，担任下季队长嘅可能性。佢哋认为麦巴比本身喺巴黎出世，又愿意同队友配合，并且往往大赛都可以发挥一定作用，今次相信亦系说服麦巴比签新约嘅最後尝试。

麦巴比今季喺PSG继续发挥出色，各项赛事上阵38场，射入28球同交出20次助攻，外界一直有传佢将会喺季尾转投西甲劲旅皇家马德里，但佢本人喺上场法甲对罗连安特赛後，曾经公开表示自己会同家人喺深思熟虑後，先至作出最好嘅选择，睇嚟两队球迷仲要再等吓。