周一(4日)凌晨西甲赛事，巴塞隆拿主场1比0击败西维尔，联赛6连胜後升上第2位，依家落後皇家马德里12分但少踢1场。巴塞隆拿今场赢得惊险，但19岁中场柏迪再次展现巨星级数，禁区顶连环假脚呃到对手一仆一碌後射入，相当精彩。

巴塞隆拿上半场同西维尔战况胶着，换边後主队明显加强压力，碧基曾接应角球头槌顶中楣，去到72分钟终由柏迪表演，佢禁区顶接应奥士文尼迪比尼传送，假装射门呃到瞓晒身嘅拿杰迪锡扑空，随即再重施故技呃埋另一守将跌低，跟住先至睇定射入死角，巴塞隆拿就凭呢个入波赢1比0。

柏迪上月欧霸盃作客加拉塔沙雷，同样系「美斯式」假脚呃到2个守将瞓地後射入，冷静头脑同细腻技术远超19岁年龄，教练沙维赛後亦激赞：「柏迪系最顶尖球员，今场入咗个超级金球，佢可以扭转比赛结果，睇佢踢波系种享受，唔好忘记佢只得19岁，冇人可以同佢相比！」