周三(6日)凌晨欧联8强首回合，曼城主场出击，展现「统治级」实力，令对手马德里体育会全场0射门。不过「蓝月亮」亦受制於对手「550」阵式严密防守，显得老鼠拉龟无从入手，幸好有天才中场菲尔科顿挺身而出，佢後备上阵仅80秒，就贡献助攻，传畀奇云迪布尼射入全场唯一入球，以1比0险胜马体会。

传控名帅哥迪奥拿遇上防反大师施蒙尼，形成1场攻防战，曼城喺控球率及比赛形势上占有压倒性优势，但马体会紧逼防守踢法，亦令主队未能创造具威胁攻门。

曼城上半场6次射门都唔中目标，马体会更加冇射门，亦系欧联史上第2次出现对赛双方上半场冇射门中目标嘅场面，上次系2016年4月曼城主场对皇马。

踢到68分钟，哥迪奥拿出招，一次过作出3个换人调动，派出加比尔捷西斯、菲尔科顿、基亚利殊後备上阵搏杀，果然立竿见影，菲尔科顿上阵仅80秒，就作出1次直传，由奇云迪布尼喺禁区右路窄角度射入。呢位比利时国脚已经喺欧联先後射入皇马、巴塞隆拿、西维尔、马体会大门，名副其实系西甲球队杀手。

另外，菲尔科顿之後仲有1次个突破，令对手防线出现混乱，贝拿度施华把握机会传畀奇云迪布尼，可惜後者未能射入，最终曼城维持赢1比0完场。

赛後曼城领队哥迪奥拿认为「蓝月亮」原本应该可以赢3球：「马体会系顶级球队，我哋赢波固然好，但其实仲有机会入第2同第3球，作出换人调动，就系希望做得更好，当然遇上1支经验丰富嘅对手，并唔容易做到。」