周四(14日)凌晨欧联8强次回合上演暴力大战，马德里体育会主场0比0打和曼城，两回合合计输0比1出局。马体会今场踢法极度粗野，踢人、撼头、扯头发等茅招尽出，补时阶段更完全失控，完场後双方喺球员通道爆发大混战，要警察介入分隔两边球员。曼城晋级後将对皇家马德里，另一场准决赛由利物浦斗维拉利尔。

曼城首回合领先1比0，马体会返主场一改上仗死守风格，大部份时间压住曼城进攻，不过面对控球能力高嘅客队未有太多威胁攻门。当比赛陷入僵局，踢法粗野嘅马体会喺最後阶段开始失控，菲腊比蒙达里奥91分钟暴力踢跌菲尔科顿，再加一脚「抽水」，结果2黄1红被逐，另一守将史提芬沙域更成为主角，佢先将受伤嘅菲尔科顿强行拉扯出场外，再被影到头撼史达宁，又扯基亚利殊头发，但球证竟然只向佢出示黄牌。

曼城坚守至完场後成功晋级，但马体会球员情绪仍未平伏，史提芬沙域同基亚利殊喺球员通道内发生口角，马体会球员禾沙积高突然「暴走」，将一对门将手套怒掟向曼城中坚拿朴迪，随即引爆大规模冲突，双方有大量肢体碰撞兼互相掷物，西班牙警方立即冲入球员通道内调停。曼城领队哥迪奥拿赛後表示：「我冇嘢好讲，唔想讨论球证或者对手，所有动作大家都睇到，我哋要开始备战英足盃。」

为电视台评述嘅前英格兰国脚里奥费迪南亦表示：「马体会球员嘅行为好差，佢哋应该为自己所做嘅事羞耻。从足球角度，马体会今仗表现出色，大部份时间将曼城逼入绝路，但比赛尾段出现嘅镜头，根本唔应该喺足球场上出现。」