车路士喺英足盃4强面对水晶宫，虽然被一致睇好可以杀入决赛，不过领队杜曹对晋级仍有顾忌，决定禁止今季被外借去水晶宫嘅干拿加历查倒戈。杜曹赛前自爆曾同非常失望嘅干拿加历查沟通，并且当面向呢位小将道歉。

虽然英超规定外借球员唔可以倒戈，不过英足盃就冇明文规定，干拿加历查嘅外借合约中，车路士就加入有权「禁止倒戈」嘅条款，果然大派用场。水晶宫领队韦拉就对车路士呢个决定表示失望，认为出战英足盃4强对干拿加历查成长有极大帮助，而「成长」正正系车路士将佢外借嘅最大原因，批评禁止倒戈嘅决定系违反原意。

杜曹赛前表示：「几个星期前我喺餐厅撞到干拿加历查，当然亦有谈及呢个话题，我睇到佢非常失望，我知道佢嘅个性同斗心，所以我当面向佢道歉，但呢个条款喺最初外借已经定立，我都冇办法。」不过，车路士其实唔系「冇办法」，佢哋喺2018年嘅英联盃，就曾经批准外借打比郡嘅美臣蒙特同汤姆利一齐倒戈，或者当时打比郡领队系「自己人」林柏特，所以先有偈倾。