巴塞寻晚0比1输畀卡迪斯，除咗争标基本无望，盃赛亦都输晒，今个球季又要四大皆空，赛後传媒作出统计，指出沙维执教胜率系20年最低，连朗奴高文都不如。

沙维去年底接掌巴塞教鞭，上任至今领军30场，巴塞赢得16场，胜率只有刚过一半嘅53.33%，上一任主帅朗奴高文胜率都有58.21%，更系2002年列沙治嘅50%胜率之後，近20年胜率最低嘅巴塞主帅。

仲有另一项数据指出，沙维接手巴塞初期，巴塞落後皇马10分，但5个月过後，巴塞落後皇马积分扩大至15分，巴塞少踢1场，如果单看表面数据，沙维都唔系咁好喎。

不过数据系死，人系生嘅，沙维季中接手，当时走势向下，军心离散，全靠沙维稳住军心，由接手时排第9，逐步收复失地至现时排第2，球队演出亦明显有进步，至少保住欧联入场券，沙维嘅执教能力，要等下个球季才见真章。