「J神」占士洛迪古斯唔经唔觉已经踏入30岁，上年开始佢更转到中东搵食，似乎开始「掘金」生涯。不过近日有传佢雄心未退，有意回归西甲，更有指想投靠马体会跟施蒙尼搵食喎。

「J神」前季离开皇马後，喺英超爱华顿一度重拾昔日光茫，更以上阵23场入6球一度帮「拖肥糖」闯入前4位置，争啲就攞到欧联资格，不过季尾因为受伤，球队表现回落，领队安察洛堤季尾更重投皇马，顿失「占士说明书」嘅爱华顿，其後更将佢放畀卡塔尔球队艾雷恩。

今季「J神」虽然喺卡塔尔超级联赛踢得顺风顺水，但佢又点会满足於此。据闻佢正计划透过经理人同马德里体育会密斟，睇吓有冇机会重返西甲赛场。事实上，马体会呢季表现失准，欧联8强止步，喺联赛亦已退出争标行列，下季好需要好似占士咁有经验嘅球员嚟帮手重建，加上喺哥伦比亚无缘世盃决赛周嘅情况下，球队更加唔使担心佢会季中踢伤脚，或者佢返番西甲搵食，会系一个双赢局面。