周三(20日)凌晨英冠，富咸主场以3比0大胜普雷斯顿，提早4轮稳夺前2位直接升班资格，阔别1季後，将於下季再战英超。富咸前锋阿历山大米祖域今仗梅开二度，今季联赛已累计入40球，成为英冠成立以来，首位单季入波「40+」球员。

榜首富咸之前连输2场，今仗终於打醒十二分精神，由阿历山大米祖域梅开二度，加上19岁小将法比奥卡华路入波，上半场已经领先3比0，一早奠定胜局，成为今季首支稳夺升班资格嘅球队。球证吹完场後，大批富咸球迷立即冲入球场同球员庆祝，场面非常壮观。

富咸降落英冠1季就可以迅速重返英超，前锋阿历山大米祖域居功厥伟，呢位27岁塞尔维亚国脚今季联赛上阵40场射入40球及7次助攻，效率非常惊人，佢效力富咸5季以来第3次协助球队升上英超，亦经历2次降班，希望佢下季可以帮富咸保住英超席位，唔好再做升降机。

另外，富咸夺得升班资格之後，下季出战英超可望获得2亿镑收入，真系和味。