曼联周四(21日)落实聘请坦哈格下季执教後，呢位荷兰教头就组军大计首度开腔，佢接受荷兰媒体访问，表明唔会因为C朗拿度等大牌球星而改变自己嘅足球哲学，而且喺转会市场要有绝对话事权。据报坦哈格同曼联已经制定未来组军嘅6大核心人物，但C朗就榜上无名。

坦哈格签约曼联後，周五(22日)接受荷兰《忠诚报》专访大谈组军方针，被问到可唔可以驾驭C朗等巨星，坦哈格表示：「我谂我可以，但我会忠於自己，唔会改变自己嘅足球哲学，我会话畀球员听佢哋嘅任务，无论系边个球员，达唔到我嘅要求就冇面畀。」

52岁嘅坦哈格表示将会喺转会市场大展拳脚，而且要求有绝对话事权：「我喺签约前向球会提出要求，如果球会唔同意，我就唔会接呢份工，因为我系球队负责人，亦系要为成绩被审判嘅人。我唔系专制嘅统治者，会同团队一齐合作，但转会话事权系我唔可以放弃嘅条件。」

延伸阅读：【曼联做「心脏手术」 坦哈格获1.2亿镑军费】

据英国《泰晤士报》报道，坦哈格今夏会有多达1.2亿镑军费买人，而佢已经制订球队重建嘅6大核心，门将迪基亚、中坚华拉尼同中场般奴费南迪斯被视为「世界级」球星，可以成为曼联骨干，而拉舒福特、查顿辛祖同麦汤米尼将会踏入事业高峰期，将会系坦哈格手下重要棋子。