虽然曼联男子队今季颗粒无收，但「红魔」嘅女子U21梯队就好争气，近日成功问鼎英超女子青训联赛（WSL Academy League）冠军，而曼联名宿苏斯克查嘅女儿加娜（Karna Solskjaer），亦有份喺比赛中披甲，亲身到球场撑囡囡嘅「苏B」，就被在场球迷争相索要合照。

继上月捧起今季女子青训盃（WSL Academy Cup）後，以北部冠军身分杀入总冠军战嘅曼联，周三（27日）再击败南部冠军车路士，於联赛封后，赢得球队今季第二项锦标。囡囡有份出战，作为爸爸嘅苏斯克查当然唔可以错过，呢位前曼联主帅就去到球场，见证加娜同队友一齐捧盃，仲喺赛後被球迷疯狂捕获，成为打卡嘅对象。

现年19岁嘅加娜，继承苏斯克查衣钵走上球员之路，仲同爸爸一样师职前锋，今季为「红魔」女子U21梯队上演地标战後，频频喺各项赛事有斩获。曼联女子队主教练Marc Skinner，就表示喺加娜身上，见到苏斯克查昔日嘅射手影子：「顶级射手识得点样保持冷静，同点样搵到埋门机会，苏斯克查喺呢方面系好出色，我觉得加娜都有类似特质。」