皇马上周六大胜爱斯宾奴，西甲提前夺冠，并即拉队喺市内胜利巡游，今次系皇马第35个西甲冠军，但最威肯定系安察洛堤，连埋西甲，佢执教生涯已经集齐英西意德法5大联赛冠军，喺巴士巡游期间，见佢担番口大雪茄，相当写意。

除咗荣誉，皇马会方亦获得丰厚奖赏，西班牙传媒报道，西甲夺冠令皇马再添一笔6120万欧元嘅奖金进帐，令球会可以继续发展。

报道指，6120万欧元是从西甲转播权当中分帐所得，今季西甲转播权收入为14.4亿欧元，当中25%即3.6亿欧元按排名分配畀20支西甲球队，冠军球队获得3.6亿欧元当中嘅17%，亦即6120万欧元。

西甲嘅奖金分发方式，系分5年发放，首年35%、次年20%，之後3季各15%，皇马每年喺西甲都排前3名，亦系前季冠军，所以球会每年都有一笔稳定嘅奖金收入，以维持开支。