欧协联决赛组合诞生，意甲劲旅罗马周五(6日)凌晨喺4强次回合，主场1比0击败英超球队李斯特城，两回合合计赢2比1，决赛将会同荷甲嘅飞燕诺争逐首届冠军。罗马教练摩连奴亦改写历史，成为第1个带领4支球队杀入欧洲赛决赛主帅，完场後「寸王」更激动爆喊。

首回合两队踢成1比1，罗马今仗返主场踢法主动，罗伦素柏历坚尼早段罚球几乎得手，结果11分钟就打破僵局，谭美阿巴谦接应角球顶入。李斯特城落後下虽有心反扑，但未能制造具威胁埋门，最终罗马守住1球胜果杀入决赛。

球证鸣笛完场後，摩连奴即时喊到面容扭曲，佢赛後表示：「点解会喊？因为我感受到球迷嘅感受，罗马系一间冇太多锦标嘅伟大球会，我知道呢场比赛对球迷嘅意义，我为佢哋而激动。我有幸参加过更重要嘅欧洲赛决赛，但呢次决赛系与别不同。」

今次系摩连奴第5次出战欧洲赛决赛，之前4次全部捧盃，包括带领波图拎03年欧洲足协盃同04年欧联、率国际米兰赢10年欧联冠军，以及带领曼联赢17年欧霸盃冠军，同时成为首个带领4支唔同球队踢欧洲赛决赛嘅主帅。欧协联决赛於5月25日喺阿尔巴尼亚地拉那举行，罗马对手系荷甲嘅飞燕诺。