已提前锁定西甲冠军嘅皇家马德里，周一(9日)凌晨会作客马德里体育会演「打吡战」，不过赛前就闹出小风波。马体会表明唔会跟从西甲「传统」，喺比赛前列队欢迎新任冠军球队登场，直指呢种做法只系想「羞辱」对手，为照顾球迷感受唔会就范。

马体会日前发出声明话：「有啲人想将本来系对冠军球队致敬嘅行动，变成必须跟随嘅步骤，而且系以羞辱对手为目的。马体会喺任何情况下都唔会参与呢种试图嘲讽我哋嘅行为，呢啲行为系违背体育嘅原意。」马体会指出佢哋近年赢冠军後，亦有球队选择唔列队，但并冇引起任何争议，马体会亦冇打算强逼对手咁做。

马体会目前排联赛第4位，仍要为欧联资格搏命，至於皇马就可以大踢风流波。马体会门将奥比历表示：「作为队长，我系唔锺意向对手列队或者接受对手列队嘅行为，不过我会遵从球会嘅决定，做我需要做出嘅行动。」