周日(8日)凌晨西甲，巴塞隆拿踢到补时4分钟，两闸合作，丹尼尔传畀佐迪艾巴射入，作客以2比1击败贝迪斯，提早取得下届欧联入场券。39岁嘅丹尼尔喺西甲已累积100次助攻，成为呢项赛事近30年以来贡献最多助攻嘅後衞。

贝迪斯亦要力争前4位参加下届欧联，双方今仗交锋，踢法非常积极，巴塞隆拿中坚朗奴阿拿奥祖有1次头槌攻门中楣弹出，贝迪斯亦有古度洛迪古斯射门中柱唔入。

踢到76分钟终於出现入波，佐迪艾巴左路传中，由後备上阵仅1分钟嘅安素法迪射入，呢位19岁新星2020年11月对贝迪斯一役受重伤，今场再遇对手，立即取得入球别具意义。

不过，贝迪斯好快靠马斯巴查顶入罚球扳平1比1，呢位中坚倒戈斗母会巴塞，并冇留情。

眼见双方即将握手言和，踢到补时4分钟，丹尼尔精准传送入禁区，佐迪艾巴第一时间凌空抽射入网，巴塞就凭呢个入球全取3分，领先第5位贝迪斯11分，提早3轮联赛稳夺前4位，可以出战下届欧联。

巴塞左右二闸成为赢波大功臣，佐迪艾巴1射1传，丹尼尔亦有1次助攻，呢位巴西老将今季联赛已有3次助攻，西甲生涯累积100次助攻，成为西甲史上第3多助攻嘅球员，仅次於美斯(189次)同费高(107次)，丹尼尔仍然有心有力，如果下季留队，应该可以超越费高嘅西甲助攻数字。