曼城卫冕英超近在咫尺！势如破竹嘅「蓝月亮」，周四(12日)凌晨英超作客5比1大炒狼队，奇云迪布尼食出「大四喜」成为赢波英雄。曼城依家以3分领先次席利物浦，而且得失球差进一步拉开至7球差距，最後2轮只要1胜1和就肯定夺冠，冠军几成定局。

曼城今仗狂风扫落叶，奇云迪布尼开波7分钟同贝拿度施华美妙合作射入，狼队5分钟後由丹当斯卡追平，不过奇云迪布尼勇不可挡，喺16、24同60分钟接连建功食出「大四喜」，加上史达宁喺完场前6分钟「埋斋」，协助曼城作客大胜5比1。

虽然喺欧联4强出局，但曼城英超冲刺嘅强势系史无前例，佢哋成为英超史上首支连续5场赢3球或以上球队，包括3比0赢白礼顿、5比1赢屈福特、4比0赢列斯联、5比0赢纽卡素同5比1赢狼队，连场大胜令曼城得失球有+72，抛离利物浦嘅+65，意味曼城就算最後2轮有1场失手输波，仍有好大机会凭得失球夺冠。

曼城领队哥迪奥拿赛後拒绝承认冠军已成囊中物：「3分已袋，依家会先休息，准备对韦斯咸嘅『决赛』。奇云迪布尼呢2、3个月嘅表现出类拔萃，系曼城最後冲刺嘅关键人物。」曼城周日(15日)作客韦斯咸，煞科战就会主场对阿士东维拉。