周日(15日)凌晨德甲煞科战，已经锁定亚军位置嘅多蒙特，主场以2比1反胜哈化柏林，呢场比赛亦变成多蒙特嘅「欢送派对」，艾宁夏兰特等多位球员喺今仗後就会离队，焦点人物夏兰特亦不负所望，以1个入球作为告别礼物。

曼城早前启动夏兰特合约中嘅买断条款後，呢位挪威前锋下季将转战英超，多蒙特赛前亦特别举行欢送仪式，向佢送上鲜花以及一幅「多谢艾宁」嘅横额，同夏兰特一齐告别嘅仲有韦素、萨加度、舒姆沙、路文贝基同马云希斯，总监索斯亦结束44年嘅「蜜蜂兵团」生涯。

哈化柏林今场要为护级而战，18分钟由贝科迪尔射入12码领先，不过多蒙特68分钟由夏兰特回敬1个12码追平，新星尤素法莫高高更喺完场前6分钟「绝杀」反胜。哈化柏林输波後跌落尾3，将要同德乙季军踢升降班附加赛。