利物浦英超冠军梦靠晒谢拉特！周三(18日)凌晨英超关键战，利物浦作客2比1反胜修咸顿，仍然以1分落後榜首曼城，周日(22日)煞科战决定冠军谁属。巧合嘅系，利物浦後上夺冠嘅最大希望，就系由前队长谢拉特带领嘅阿士东维拉要令曼城失分，利物浦队长佐敦轩达臣表明：「我会打畀谢拉特！」

利物浦日前捧走英足盃冠军，呢场不容有失嘅赛事大胆作出9个变动，果然喺13分钟就出事，列特文快速反击为主队先拔头筹。利物浦失守後沉着应战，27分钟南野拓实窄角度射入追平，「红军」之後一直控制战局，67分钟再由祖尔麦迪比顶入角球，带领利物浦反胜全取3分。

英超只剩最後1轮，落後曼城1分嘅利物浦处於被动，煞科战佢哋要击败狼队，同时要希望曼城喺阿士东维拉身上失分。维拉领队正正就系「红军」传奇队长谢拉特，呢位球迷至爱效力利物浦17载都未尝英超冠军滋味，估唔到依家仍然有机会「协助」利物浦夺冠，成为一大话题。

利物浦队长佐敦轩达臣赛後话：「我今个星期可能会打电话畀谢拉特，希望佢可以帮下我哋。」领队高普亦表示：「我认为曼城唔会失分，但利物浦仍有可能捧盃，『有可能』已经足够，足球就系咁样。首先我哋要赢狼队，唔好当狼队唔存在。」高普最後亦表明：「我希望谢拉特可以击败曼城！」