曼联日前签入身高仅1米75嘅中坚利辛度马天尼斯，被指防守高空波输蚀，但车路士有样学样，同意斥资5,500万欧元转会费，收购西维尔中坚祖利斯古迪，呢位法国国脚身高1米78，可见矮仔中坚一样非常抢手。

西班牙《马卡报》指西维尔已经收到报价，车路士提出以5,500万欧元买祖利斯古迪，比上年8月开价多500万欧元。虽然西维尔要求6,500万欧元转会费，但由於祖利斯古迪去意已决，甚至早几个月已经接受车仔开出嘅薪酬待遇，预料西维尔难以再留住呢位23岁後衞，或会接受车仔报价。

车路士今夏已经有2位中坚鲁迪格、安达斯基斯坦臣离队，加上艾斯派古达亦有可能转投巴塞隆拿，领队杜曹急需要签入中坚，日前已收购咗拿玻里中坚高列巴尼，如果可以买埋祖利斯古迪，可令防线人脚更充裕。

祖利斯古迪上季为西维尔上阵44场入3球，除咗踢中坚之外，仲可以出任右後衞。值得一提，车仔队长艾斯派古达身高都系1米78，证明矮仔中坚踢英超，并唔会输蚀。