新一季英冠周六凌晨开锣！打头阵即有重量级戏码，上季差少少就升上英超嘅哈特斯菲尔德，主场迎战实力强横嘅般尼。般尼上季经历英超降班之痛，今季请嚟比利时名将高柏尼执教，哈特斯菲尔德出现重大将帅变动，实力大打折扣，博般尼客胜好路。

（有线661及601台周六凌晨3时直播）

哈特斯菲尔德上季排英冠第3位，喺升班附加赛亦杀入决赛，可惜最後不敌诺定咸森林无缘升班。球队功亏一篑後变成泄气皮球，领队哥比兰月初辞职，临时搵史高菲特上任执教，两大主力路易斯奥拜恩同哈利托夫路，亦以合共1,000万镑转会费加盟诺定咸森林，对球队打击颇大。

般尼降落英冠後，难免有多名球星离队，不过阵中仍有艾殊利班尼斯、哥尼特、积克确克等大批经验丰富战将，最重要系由安德列治请嚟高柏尼执教，证明般尼决心重整旗鼓。哈特斯菲尔德季前基本上冇任何重要收购，而且球队出名慢热，佢哋近4季联赛首战都赢唔到波，只有1和3负成绩，虽然般尼最终能唔能够升班仲系未知之数，但要赢战斗力大降嘅哈特斯菲尔德打响头炮，难度应该唔大。