2016年协助李斯特城「童话式」捧英超冠军嘅门将卡斯柏舒米高，周四(4日)宣布转投法甲球会尼斯，结束长达11年嘅「狐狸」生涯。35岁嘅卡斯柏舒米高系曼联传奇舒米高个仔，两父子都系丹麦国脚兼英超冠军球员，今次转战法甲签约3年，可能系佢足球生涯最後一站。

李斯特城声明表示：「效力球会11年後，卡斯柏舒米高决定转投尼斯，结束佢喺李斯特城嘅神奇之旅。」卡斯柏舒米高喺曼城青年军出身，之後踢过诺士郡、列斯联等球队，2011年加盟李斯特城後愈踢愈好，帮球队赢过英超、英足盃同社区盾冠军，11年间为球队上阵479场比赛。

卡斯柏舒米高系2018年班主维猜直升机意外嘅目击者，当日系比赛後1个钟头，好多球员都离开咗王权球场，但舒米高当时仲未走，因为佢带住由丹麦过嚟睇自己比赛嘅家人行咗球场一个圈，睇住直升机喺球场起飞，临走时仲同维猜挥手讲拜拜，目赌整个悲剧过程。

卡斯柏舒米高喺twitter拍片道别：「经过11个神奇球季，我作出离开呢个艰难决定，李斯特城对我嚟讲唔止系一间球会，系我认识毕生好友所有回忆嘅家。」

尼斯今季会出战欧霸盃赛事，佢哋日前已宣布签入自由身嘅艾朗蓝斯，志切增强实力。李斯特城放走卡斯柏舒米高後，表示唔会收购新门将作为替补，领队罗渣士证明2号门将丹尼禾特将会成为正选。