新一季英超今晚开锣，揭幕战上演「伦敦打吡」，由水晶宫主场硬撼阿仙奴。获射手「耶稣仔」加比尔捷西斯加盟嘅阿仙奴，攻力全面升呢，不过佢哋上季两斗水晶宫都未赢过，可见水晶宫主帅韦拉对旧东家了如指掌，既然两队近年交手例必大手交易，一於捧中位数2.5球入球大。

（Now 621及611周六凌晨3时直播）

上季临尾香失落前4嘅阿仙奴，今夏积极增兵，除咗收回借将後衞威廉沙列巴之外，主帅阿迪达收购两名曼城旧部加比尔捷西斯及辛真高来投最瞩目。其中「耶稣仔」加盟，全面激活球队进攻，佢唔单止勤於逼抢，为新队友布卡约沙卡、加比尔马天尼利等制造机会，「耶稣仔」埋门一脚亦甚具威胁。

睇番之前5场正式热身赛，呢位巴西国脚合共轰入7粒，包括上仗酋长盃狂数西甲球队西维尔6蛋之役大演「帽子戏法」，而「兵工厂」喺呢5仗赢晒共入20球，火力全开，今场揭幕战亦系打吡战，预计阿仙奴会全力抢攻争头彩。

不过水晶宫亦非善男信女，呢班波上季由前阿仙奴队长韦拉接手，一改以往过於倚赖韦费特沙夏数胡嘅弱点，韦拉提拔马克古希、干拿加历查、米高奥利斯等新人，更加注重进攻，上季早早抢够分上岸兼杀入英足盃4强之余，联赛两斗阿仙奴更获1胜1和，包括主场大胜3比0，似乎韦拉专克旧东家，就算干拿加历查已被车路士收回，今场亦唔会龟缩。翻查纪录，双方近11次交手，有9次开3球或以上，不妨向2.5球入球大埋手。