今夏有关C朗传闻不绝，曼迷及朗迷反应两极，其他球迷食晒花生，曼联深受其害，C朗日前终於打破沉默，准备向传媒大反击，佢透过回应球迷方式，表示几星期後将会亲自揭露真相，仲话自己用笔记簿写底晒呢段时间假新闻，到时就会公诸於世。

关於C朗嘅报道一直围绕今夏有意离开曼联，不过C朗本人从未公开谈论自己未来，期间只有少数辟谣举动，例如曾传出佢现身士砵亭，C朗本尊直指系假新闻，亦曾经斥责部份记者为咗网络流量作故仔，不过对於其余传闻佢都冇回应。

曼联开季两连败跌落榜末，嚟紧仲要火并死敌利物浦，喺呢个水深火热关头，C朗以一个耐人寻味方式回应传闻，就系以本尊喺一位名为cr7.o_lendario球迷社交媒体上作出回应。

C朗留言表示：「几星期内，我会接受访问，到时大家就会知道真相，传媒一直讲大话，我有一本笔记，将呢段时间嘅新闻记底，100条新闻当中，只有5条系真嘅，你哋估系边几条？」