英超周中开快车，争标集团今晚一齐出击，唯一4战全胜之师阿仙奴主场斗阿士东维拉，「兵工厂」赢波唔好畀佢停，誓要力争再下一城，保住「一哥」之位。至於上季盟主曼城火力全开，射手艾宁夏兰特上仗大演帽子戏法，今仗对手诺定咸森林顶唔顶得住呢？另外，上仗向对手派9只光蛋嘅利物浦遇上「新土豪」纽卡素，将有激斗，当然唔少得「伦敦打吡」韦斯咸对热刺，一於睇下「孙仔」可唔可以入波开斋！

今晚英超快车焦点战，「一哥」阿仙奴主场迎战阿士东维拉。阿仙奴刮起强劲嘅青春风暴，以加比尔捷西斯为首嘅攻击线坚抢缰，挟联赛4连胜之势，必趁维拉阵脚未稳抢攻，务求速战速决，半场主胜捧得过。（Now 624周四凌晨2时30分直播）

阿仙奴今季中前场活力十足，新箭头加比尔捷西斯唔单止入波助攻瓣瓣有，而且佢能带动加比尔马天尼利、布卡约沙卡等队友喺前场做逼抢，逼到对手犯错而博到进攻机会，更容易争取入球。睇番阿仙奴开咧後联赛4连胜之余，有3次喺上半场已经取得领先优势，明显见到主帅阿迪达打闪击战嘅策略相当成功。

另一边厢，维拉今季表现飘忽，头4轮取得1胜3负，先後不敌水晶宫、升班球队般尼茅夫及韦斯咸，4仗联赛均有失波，新兵中坚迪亚高卡路士因重伤长抖，令本已不稳嘅防线更加弱不禁风，搞到主帅谢拉特头都痕埋。

况且阿仙奴主场出击零舍Sharp醒，连同上季在内，「兵工厂」近4仗联赛主场赢晒，当中亦有3次半场领先，况且阿仙奴下仗联赛要作客硬撼复苏中嘅曼联，更加难打，今仗必定想尽快入波锁定胜局，唔使班球员搏到咁尽，稍为留力为下场硬仗做好准备，半场主胜咪错过。