车路士上仗欧联不敌萨格勒布戴拿模之後，领队杜曹迅速被炒，令人大感意外，因为成绩差劣嘅李斯特城主帅罗渣士，以及「双特」谢拉特、林柏特仍然在位，反而杜曹却行先佢哋一步。

英国《电讯报》着名记者Matt Law爆料，指杜曹真正「死因」并非成绩，而系因为反对新老板保利签C朗，会方今次只系借输波炒佢。

以保利为首嘅美国财团今夏收购车路士後，雄心壮志投入巨额资金增兵，保利原本希望签入C朗，因为呢位葡萄牙巨星商业价值极高，啱晒美国财团经营球会嘅方针。不过，杜曹基於战术原因，一句：「NO」，就令保利嘅如意算盘打唔响。

当时保利把口就话尊重杜曹决定，但内心点谂，可能又系另一回事。事实上，车路士易主後，管理层已经大换班，杜曹属於球队人员，原本可以留底，但却因为唔听老板说话，结果都系要执包袱。

杜曹走咗之後，保利为签入C朗，扫除一大障碍，话唔定明年1月转会市场重开後，会再出手签C朗。