被视为欧洲球坛下一位「怪兽」嘅斯洛文尼亚前锋施斯高，周三(28日)凌晨欧国联B4组技惊四座，佢轰入一记超高难度嘅窄角度窝利，足以媲美荷兰传奇射手云巴士顿1988年嘅「零度窝利」世纪金球，曼联今个夏天唔签佢真系走宝！

斯洛文尼亚今场作客瑞典，如果输波就要降班，不过28分钟就有好开心，19岁嘅施斯高喺左路接近底线位置，接应队友长传後，第一时间起左脚窝利抽入，难度同姿势分都攞足100分！虽然瑞典由科斯贝治追平，但1比1嘅赛果仍确保斯洛文尼亚护级成功。

呢个金球被传媒用嚟同云巴士顿嘅经典相比，呢位荷兰传奇喺1988年欧国盃决赛嘅世纪金球，无论角度、位置同射法都一模一样，足证呢位小将潜力无限。目前效力萨尔斯堡嘅施斯高，今夏曾经系曼联收购目标，但最终畀RB莱比锡用2,400万欧元转会费抢走，施斯高会喺下季正式转战德甲。