热刺後防艾马逊自上年加盟後，表现都系弹多过赞，不过呢位巴西球星就相当有心，竟然豪花80万镑自我增值，希望可以提升表现博取领队干地欢心！艾马逊「带钱打工」嘅上进做法，绝对系所有老板梦寐以求嘅好员工！

据英国《太阳报》报道，今季稳坐热刺右翼衞正选嘅艾马逊，原来私下用尽方法去改善演出，包括斥巨资购入「高压氧治疗舱 」帮助身体恢复、聘请神经科学家为自己减压同心理辅导，甚至请埋球探去研究巴黎圣日耳门球星阿舒拉夫嘅踢法，制成报告畀佢参考，因为阿舒拉夫效力国际米兰嗰阵，就系被干地打造成世界最佳右翼衞，艾马逊希望从中偷师。

报道指艾马逊以上种种自我增值措施，足足花咗佢80万镑，而呢位巴西球星喺热刺嘅周薪只系得4万镑左右。艾马逊如果真系可以提升水平，呢笔长远投资将来都会有回报嘅。