艾宁夏兰特喺英超连续3场主场大演帽子戏法，震惊全球，原来佢老窦都有功劳，就系每逢曼城主场，佢赛前会畀阿仔食佢特制嘅意大利千层面，食完就入波，万试万灵。

夏兰特表示：「老窦识整意大利千层面，现时曼城每次主场比赛前，佢都会整畀我食，依家每场波嘅赛果都非常之好，我觉得佢一定系加咗特别嘢喺里面。」

曼城有得用夏兰特就尽用，因为转会专家Fabrizio Romano又爆料，原来夏兰特同曼城嘅合约存在解约条款，去到某个年期就会激活，而佢下一站目的地会系皇马。

Fabrizio Romano指出：「夏兰特对自己嘅生涯规划比金钱重要，之前喺萨尔斯堡，曼城同祖记都出更高价钱，但佢选择去多蒙特，因为蜜蜂兵团更适合佢成长，今次去曼城亦一样，有一份更高价值嘅合约畀佢拣，但佢认为呢个阶段应该去曼城。」

至於夏兰特同曼城嘅合约细节，Fabrizio Romano坦言仍然需时了解，但肯定留有解约条款；与此同时，西班牙6台已经畀咗答案，一位前皇马高层人士爆料，夏兰特嘅合约将於2024年激活解约条款，并只对皇马生效，到时就系佢加盟银河舰队之时。