周一(17日)凌晨法甲大战，巴黎圣日耳门(PSG)主场1比0击败争标大敌马赛，盛传「有仇」嘅基利安麦巴比同尼马罕见合作入波，系2大前锋半年来首次成功连线，交出助攻嘅麦巴比赛後更否认提出转会要求，粉碎离队传闻。

PSG今场继续派出美斯、尼马、麦巴比嘅「MNM」锋线，制造唔少埋门机会，美斯曾射罚球中楣弹出，去到上半场补时阶段，麦巴比左路传中，尼马禁区内第1时间抽入，呢球系2人自今年4月之後首次「合作」入波。下半场马赛全力反扑，但基葛特72分钟飞铲尼马食红牌，踢少个下返魂乏术，PSG小胜1比0完场。

PSG赢波後以29分排榜首，领先次席罗连安特3分，早前有传麦巴比要求1月转会，但呢位法国前锋赛後表示：「我从来冇提出1月转会，听到呢单消息我都好震惊，我喺PSG好开心，呢啲传闻完全唔关我事。」