曼联领队坦哈格再显「铁帅」风范，除咗之前够胆雪藏球星C朗之外，对於「契仔」云迪碧克亦狠下心肠，警告呢位25岁中场，如果再交唔出表现，就会出售佢，荷兰同胞都冇情讲。

云迪碧克2020年8月由阿积士加盟曼联以来，一直长居後备，上季下半季更被外借去爱华顿。昔日阿积士恩师坦哈格今季成为曼联主帅之後，各界以为云迪碧克能够翻身，但却事与愿违，特别系坦哈格已经畀足机会呢位「契仔」，近3场都派佢踢正选，可惜演出欠佳，踢得最长时间一场都系66分钟就被换走。

坦哈格接受英国传媒访问时，言语间已经对云迪碧克失去耐性：「再将云迪碧克外借，并唔合理，佢一系交出表现，证明自己值得留队，一系转会，英超对於佢而言，的确比较难踢，入波名单、助攻名单都冇佢嘅名，需要积极提升水准，佢应该担任10号仔角色，但今时今日，呢位置绝对唔易应付。」

云迪碧克为曼联合共上阵57次，仅入2球及2次助攻，加上基斯甸艾历臣、卡斯米路加盟之後，令佢存在价值进一步下降，坦哈格有意出售云迪碧克，并唔出奇，最大机会可能步另一位曾经效力曼联嘅荷兰国脚戴利白兰特後尘，重返阿积士。