现时世界排名第2位嘅比利时球星如云，一直被认为有能力问鼎今届世界盃冠军，但主力奇云迪布尼却唱衰球队，指呢支「欧洲红魔」阵容太老，冇机会捧盃。

奇云迪布尼被传媒问到比利时捧世界盃机会时，佢话：「我认为球队赢世界盃最好机会系2018年，今届失去部份关键球员，亦补充几位优秀新人，但水平同上届有距离，同埋年龄都系一个问题，我哋太老，今届世界盃冇机会夺冠。」

比利时上届打入4强，并获得季军，今届首仗仅小胜加拿大1比0，奇云迪布尼指踢大赛虽然经验重要，但现今足球比赛对身体质素要求非常高，始终拳怕少壮。

不过，亦有舆论认为奇云迪布尼之所以「扮矮仔」，其实系想为队友减压，希望静静咁赢，好过轰烈咁输。