周一（28日）晚世盃G组次轮赛事，塞尔维亚一度反先下捉到鹿唔识脱角，喀麦隆凭後备上阵嘅奇兵阿布巴卡入波兼助攻，逼和3比3。

双方赛前都系冇分，不过喀麦隆开波前先爆内讧，正选门神奥拿拿因纪律问题，被踢出世盃大军名单，有指主帅尼高拔桑治要求佢改变用波嘅踢法，尽量都大脚清，搞到两人吵大镬，就算该国足总主席伊度奥出面调停都冇用，惟有改由伊柏斯把关。

塞尔维亚续以神锋阿历山大米祖域挂帅，开波冇耐佢喺右路扣过尼高拉斯尼古路，窄位抽射中柱弹出，之後佢趁住喀军解围唔远快射仅仅出界。初段受压嘅喀麦隆，反而喺29分钟藉住一次角球攻击，由冇人看管嘅卡斯迪列图近门撞入，意外地先开纪录，完半场前塞尔维亚及时反弹，先有杜辛泰迪治罚球传中，史达轩查柏夫洛域顶入扳平，佢冇耐再交畀米连高域沙域远射，伊柏斯飞尽掂到少少都入，3分钟内极速反先2比1。

易边後塞尔维亚继续抢攻，53分钟史达轩查柏夫洛域妙传阿历山大米祖域射成3比1。之後塞军出现松懈， 喀麦隆则换入阿布巴卡立竿见影，63分钟佢笠射破网，虽然球证判越位，但经过VAR提示後判入球有效，3分钟後佢快放後横传畀祖普莫亭扳平，最终打和3比3，两军依家各得1分，仍保持出线机会。