阿根廷靠美斯1传1射淘汰荷兰，打入世盃4强，呢位巨星喺该场大战被侵犯8次，总计今届世盃，美斯已经被侵犯19次，超越上届世盃尼马嘅18次，系今届被侵犯次数最多球员。

传媒统计，今届世盃暂时被侵犯球员前3位，分别系阿根廷美斯(19次)、塞内加尔伊斯美拿沙亚(17次)、巴西尼马(16次)，前3位当中只有阿根廷未出局，美斯嘅被侵犯次数势必继续刷新。

虽然今届世盃多咗镜头mon住，犯规无所遁形，但有时为防守唔失波都要落脚狠辣拦截，近两届世盃有VAR，被侵犯次数已经减少，2018世盃被侵犯最多系尼马，共17次，但美斯今届嘅19次已超越上届嘅尼马。

再数世盃有纪录以来，被犯规次数最多球员，前4位都来自阿根廷，前3位都系同一个人，佢就系马纳当拿，1986年(53次)、1990(50次)、1982(36次)，3届世盃都系被侵犯最多球员，第4位系1998年阿根廷嘅奥迪加(33次)。

至於其他被侵犯最多巨星，1974年荷兰嘅告鲁夫(30次)排第8，2014年荷兰洛宾(28次)排第10，2010年西班牙恩尼斯达(26次)排第12位。