「一代球王」比利上星期病逝，丧礼喺巴西时间周一(2日)朝早开始，山度士主场有大批球迷排队入场，希望同比利作最後道别，据报人龙长达2公里；比利嘅100岁妈妈亦有现身。国际足协会长恩法天奴更表示，会向全球所有国家提出，将佢哋其中一个球场命名为比利球场，纪念呢位足球传奇人物。

比利丧礼喺山度士主场贝尔米罗球场举行，仪式未开始已有大量球迷喺场外排队，唔少球迷心情激动，比利嘅日裔太太青木被影到不时拭泪，报道指比利嘅100岁妈妈亦带病到场，尼马爸爸等球圈中人都齐齐送别比利。

国际足协会长恩法天奴亦有到场，佢更提出一项重大建议：「我哋会询问国际足协211个会员国，希望佢哋将其中一个足球场以比利命名。」3届世盃冠军得主比利，上星期因结肠癌离世，享年82岁。