除夕夜英超激战轮住上，球迷由2022睇到2023年。当中早场曼联作客狼队。狼队喺新帅卢比迪古首度领军下，上仗擸宝贵3分，不过今场对手换成曼联，抢分难度大增。曼联世盃後状态火热，翻查狼队近5仗联赛主场1胜4负靠唔住，曼联食得出呢铺尾胡。（Now 621及611周六晚8时30分直播）

狼队上场抢分大战面对爱华顿，其实表现唔算特别好，开赛早段即被「拖肥」攻破大门，不过爱华顿积弱太深未能保住胜局，狼队喺上半场先由普丹斯扳平，补时5分钟再由後备上阵嘅艾洛利建奇功反胜2比1，呢场胜利无疑对士气有一定帮助，但无可否认有啲好彩，今晚对住实力强横得多嘅曼联，睇怕运气都帮唔到狼队手。

C朗离队踢落更有朝气

反观曼联喺世盃结束後，上仗联赛主场净胜诺定咸森林3比0，演出充满说服力，就算C朗离队，拉舒福特、加拿祖、安东尼马迪尔及艾兰加等因而受到重用，球队踢落更有朝气，加上利辛度马天尼斯及华拉尼两位出席世盃决赛嘅球员已经归队，可以随时候命，令主帅坦哈格调兵遣将更灵活。

曼联赛前传出斟介多时嘅荷兰国脚加普，畀利物浦拦途截劫，但咁样反而激发阵中球员更落力，想踢争气波证明自己，面对实力较弱嘅狼队，正系一展身手好机会，开出客Ｗ为球迷送旧迎新。