周四(5日)凌晨西盃32强赛事，巴塞隆拿作客西丙嘅CF英特城，3度领先下都被追和，最後要踢到加时先至险胜4比3，表现令人失望，不过教练沙维赛後就话收货，赞扬CF英特城表现突出，晋级系理想结果。

巴塞今场虽然收起罗拔利云度夫斯基等主力，不过正选阵容个个国脚级，朗奴阿拿奥祖、奥士文尼迪比利同拉芬夏比洛尼入波3度领先，但CF英特城嘅苏迪维拿大演「帽子戏法」，3度帮主队追成平手。去到加时赛，巴塞喺103分钟凭安素法迪攻入致胜球，惊险赢4比3晋级。

虽然赢得拖泥带水，但沙维赛後就话唔失礼：「我哋仲踢紧西盃，但已有7支西甲球队被淘汰，佢哋系咪好失礼？今场赢得好辛苦，加时之前本来有好多机会赢波，但就把握唔到，球员要喺错误中吸取教训，我对今场比赛同结果都好满意。」