曼联正式宣布，以借用形式签入前锋韦格贺斯，为期半季，但呢位身高1米97嘅荷兰国脚因为赶唔切注册，未能为红魔鬼出战周六(14日)晚英超曼市打吡战主场对曼城。

现年30岁嘅韦格贺斯原本今季被英冠球队般尼外借去土耳其劲旅比锡达斯1季，曼联为咗令比锡达斯提早放人，向对方支付250万镑赔偿，成功签入呢位「空中霸王」。

韦格贺斯签约後话：「我以前曾经同曼联交手，依家却身穿呢件红色球衣，感觉好奇妙，我知道球队近几个月喺坦哈格带领下取得好大进步，我向大家保证未来几个月会为球队付出最大努力，好期望同队友们见面。」

韦格贺斯今季为比锡达斯上阵18场入9球，佢代表作一定系今届世界盃8强後备上阵入2球，协助荷兰逼和阿根廷2比2，虽然荷兰最终互射12码败阵，但韦格贺斯仍然一战成名，并吸引曼联借用佢，填补C朗离队之後嘅位置。