周一(13日)凌晨西甲赛事，巴塞隆拿凭柏迪一箭定江山，作客1比0小胜维拉利尔，依家以11分抛离踢少1场嘅皇家马德里，喺联赛榜独占鳌头！巴塞隆拿近6场联赛第4次赢1比0，今季「煲鱼生粥」次数已追平球会历史纪录，教练沙维就话会尝试赢得更好「好睇」。

趁住皇马出战世冠盃，巴塞今轮继续巩固榜首优势，但作客维拉利尔踢得颇为吃力，控球同攻门次数都唔及主队，不过新星柏迪再一次做救世主，佢喺18分钟射入全场唯一入球，协助巴塞全取3分。柏迪今季有6个联赛入球，总共为球队抢到10分，系西甲入球「含金量」最高球员。

Opta数据显示，巴塞今季21场联赛当中，有7场系赢1比0，追平球会史上单季最多1比0胜利纪录，旧纪录86/87、95/96同96/97球季，呢3季佢哋踢晒全季超过40场联赛先至录得7场1比0，今季只踢半季多啲已经平纪录，堪称系「鱼生粥专家」。

对於经常以1比0赢波，教练沙维当然唔会介意，对佢亦表示想赢得更精彩：「我哋有足够机会入更多波，但好多时候喺最後一传、射门上做得唔够完美，我哋系一支进攻型球队，我哋想入第2、第3球，但事实系我哋用最小嘅分差赢咗好多比赛。」