前西班牙「金童」鲁尔2018年重返皇马，出任青训梯队教练，转眼过咗5年，由佢领军嘅皇家马德里B队今季成绩理想，近期喺第3级联赛Group1录得18场不败，强势升上榜首，皇马官方都发帖道贺。

45岁嘅鲁尔本身系皇马青训产品，挂靴後回巢培育年轻球员，可以话系一种传承，而且有评论指佢迟早会执教皇马一队，喺青训系统执教系为将来入主皇马做准备。由2019年开始佢接手皇马B队，成绩保持平稳，执教首季喺第3级联赛Group1排第7，第2季喺Group5 GroupA排第2，上季喺Group2排第10，今季系佢第4个球季。

皇马B队今季成绩甚佳，24战取得13胜9和2负，上仗2比0击败Linares後近18场不败，暂以48分升上榜首，不过能否夺冠仲有一番激烈竞争，因为排第2嘅艾高干及第3位嘅拉科鲁尼亚，仅落後榜首1分及2分，嚟紧两个月系关键。