基利安麦巴比去年夏天留效巴黎圣日耳门，令球迷大跌眼镜，一年好快过去，原来又到呢位法国前锋决定去留时候，报道指，PSG希望同麦巴比更新合约，如果倾唔成，今夏会将佢挂牌出售。

麦巴比去年喺99%转投皇马情况下，剧情大反转续约PSG，为期3年，除咗获得超高人工，更得到话事权，不过双方今季关系似乎唔算融洽，不时有「麦总」唔高兴嘅传闻。

而且PSG同麦巴比嘅合约表面上系3年，但「麦总」可以喺2024年选择离队，所以合约实际上只得两年，PSG现要求麦巴比续长约，由依家至季尾4个月内进行谈判，如果谈判破裂，PSG就喺今夏出售麦巴比。

不过，有能力同财力接收「麦总」嘅球会相当有限，因为佢现时喺PSG年薪为天价，3年总收入达到税前6.3亿欧元，皇马又表明唔会签佢，要搵买家都唔容易。