上场意甲联赛拎到今季第3面红牌嘅罗马教练摩连奴，近日再面临「教坏细路」指控，消息指佢喺上周一场U14赛事，公然向一名准备射12码嘅小球员发出嘘声，之後又教罗马小球员要「扮抽筋」拖延时间，被批评向小球员贯输错误嘅足球观。

摩连奴喺周三(1日)对克雷莫纳一仗食红牌前2日，曾出席罗马U14对拉素嘅「罗马打吡」。据意大利《晚邮报》报道，摩连奴喺呢场U14联赛参与度甚高，当拉素小球员米路主射12码期间，「寸王」竟然喺後备席发出嘘声骚扰对手，而喺比赛尾段罗马领先2比1嗰阵，摩连奴又下令球员「扮抽筋」拖延时间。

罗马U14最後赢出呢场「罗马打吡」，摩连奴亦同全队合照庆祝，不过拉素教练艾森马对摩连奴嘅行为非常不满，完场後曾对摩连奴表示：「你咁做完全系过晒界。」唔少网民亦批评摩连奴向U14球员贯输错误嘅足球观，系教坏细路行为。