纽卡素早前喺英联盃决赛饮恨，不过德国门将卡利奥斯表现就获得好评，呢位29岁门将更「一战翻身」，据报获意甲劲旅国际米兰垂青，有意喺夏天搵佢自由身过档，而卡利奥斯索女友Leotta更推波助澜，有望实现呢宗童话式转会。

因为尼克普比同杜巴夫卡唔能够上阵，纽卡素3号龙门卡利奥斯喺英联盃决赛临危受命，估唔到接近2年来首次比赛，就为佢赢到重生机会，据《FC Inter News》网站报道，国际米兰希望物色新嘅2号门将，取代38岁嘅汉丹洛域做奥拿拿副手，卡利奥斯同纽卡素合约季尾完结，国米就想佢自由身加盟。

意大利传媒报道，卡利奥斯好大机会接纳意甲球会斟介，其中一大原因系佢女朋友，就系被誉为「意甲最索体记」嘅Diletta Leotta，呢位意大利《DAZN》主播一直鼓励男友去意甲效力，卡利奥斯在公在私都有去意大利发展嘅理由。