曼联作客利物浦遭遇0比7耻辱败仗，队长般奴费南迪斯更成为众矢之的，呢位葡萄牙国脚今场表现差劲，除咗不断埋怨同投诉之外，输到6球之後竟然要求被换走！曼联季初喺曼市打吡惨败，领队坦哈格当时话唔畀C朗入场，系「唔想佢受惨败羞辱」，般奴费南迪斯似乎想有相同「待遇」，但就被加利仔、坚尼等名宿炮轰。

曼联输到0比6嗰阵，坦哈格用艾兰加入替拉舒福特，当时喺中圈嘅般奴费南迪斯就摊开双手示意「点解唔换我？」加利尼维利就非常不满：「佢问点解唔系换走佢？老实讲佢下半场表现系耻辱，我已经受够佢只系识摊大双手，又唔跑唔追，完全唔系队长应该做嘅事。」

另一曼联名宿坚尼同样向般费开火：「般费嘅身体语言真系好令人尴尬。」般奴费南迪斯今场仲卷入另一争议，佢疑似「做戏」扮被伊巴希马干拿迪打面，加利仔亦睇唔过眼：「佢畀人推胸口一下，就掩住面瞓低，我相信坦哈格会好强烈咁处理般奴费南迪斯嘅问题。」