今季成绩低迷嘅车路士，周日(5日)凌晨主场1比0击败列斯联，拎到2023年第2场胜仗，暂时帮领队朴达续命，不过呢位英格兰教头喺领先後，即刻换入防守球员想保住胜果，被球迷批评系「认衰仔」式换人，朴达赛後就公开反驳。

赛前有传朴达嘅帅位，会由今场对列斯联以及下仗欧联对多蒙特决定，车路士今仗不敢怠慢，主场出击控制战局，可惜创造力依然欠奉，半场喺球迷嘘声下闷和0比0。换边後形势冇乜变化，但53分钟就由韦斯利科芬拿藉角球攻势顶入全场唯一入球，令车路士终止6场不胜走势，帮朴达「续命」。

不过朴达今场仍然受到批评，佢喺领先1比0後，68分钟将祖奥菲历斯同史达宁2大进攻主力换走，由2名工兵干拿加历查同萨卡利亚入替，明显系想稳守胜局，唔少车路士球迷批评佢太过保守。朴达赛後解释：「当时比赛拉锯，我都想进攻，但当你入唔到波就需要稳定场面，列斯联系英超其中一支效率最高球队，开放式斗攻会更加危险。」

朴达依家先过一关，周三(8日)凌晨欧联16强次回合对多蒙特会系生死战，朴达表示：「我明白球队近期成绩唔好，呢个系我嘅责任，所有批评都系公平，但我对呢班球员同呢支球队充满信心，赢波会令球员更加自信，继续改善同赢波系我哋嘅工作。」