周日(30日)凌晨西甲赛事，巴塞隆拿主场4比0大炒贝迪斯，距离联赛冠军又迈进一大步，不过今场焦点唔系入波嘅罗拔利云度夫斯基或者1射1传嘅拉芬夏比洛尼，而系首演嘅15岁「新人王」耶马，呢位2007年出生嘅天才成为巴塞史上最年轻上阵球员，短短10分钟时间几乎入波兼助攻，认真犀利！

巴塞今场赢得轻松，14分钟拉芬夏比洛尼右路传中，安达斯基斯坦臣头槌顶入先开纪录；33分钟贝迪斯守将艾加干沙利斯2黄1红被逐，踢多过嘅巴塞即把握机会入多2球，罗拔利云度夫斯基同拉芬夏比洛尼分别建功，带住3比0优势返更衣室。

下半场巴塞控制战局，耶马喺场边热身已经引起球迷欢呼，82分钟古度洛迪古斯摆乌龙令巴塞领先4球後，耶马终於喺83分钟登场，并以15岁零290日之龄，成为巴塞史上最年轻上阵球员。耶马并冇怯场，先系禁区内偷波施射被门将扑出，再有2次精彩过头妙传，可惜奥士文尼迪比利龙门口未能接应。

耶马喺巴塞青年军表现超班，被誉为拉马西亚自美斯後最出色嘅「产品」，教练沙维赛後表示：「我叫佢要尝试唔同嘅嘢，只得15岁，佢系个好特别嘅天才球员，佢识又入又识助攻，我喺训练场就见到佢将会成为伟大球员。」巴西翼锋拉芬夏比洛尼亦加入赞赏：「我15岁嗰阵只系同邻居踢波，如果佢今场入波真系不得了！」