上周中提前锁定意甲冠军嘅拿玻里，周一(8日)凌晨喺主场开冠军派对，球队亦凭域陀奥森汉一箭定江山，以1比0击败费伦天拿「赠兴」。域陀奥森汉今场攻入佢喺意甲累积第47球，超越利比里亚传奇韦亚，成为意甲史上入波最多非洲球员。

拿玻里主场今仗变成大型庆祝派对，球迷拉晒横额贺球会第3度赢得意甲冠军，费伦天拿球员亦列队欢迎新任冠军入场。拿玻里今场表现唔算太好，下半场早段博到12码，但域陀奥森汉操刀宴客，不过拿玻里74分钟再次博到12码，域陀奥森汉第2次主射终於建功，协助拿玻里赢1比0。

域陀奥森汉射入今季第23球，亦系佢喺意甲累积第47球，超越AC米兰名将韦亚46球纪录，成为意甲史上入波最多非洲球员。呢位尼日利亚前锋赛後表示：「虽然我射失第1个12码，但系我好有信心可以射入第2个，入球嘅感觉真系好好！」