周一(8日)法甲上演峰回路转嘅神奇赛事！里昂主场迎战蒙彼利埃合演9个入球大战，两队前锋拿卡锡迪同艾尔华希分别食出「大四喜」，最终里昂喺一度落後1比4劣势下，补时10分钟戏剧性5比4「绝杀」赢波。

里昂今场31分钟由拿卡锡迪先开纪录，不过後防之後不断犯错，被蒙彼利埃嘅20岁前锋艾尔华希喺40、41、53同55分钟连轰4球，由领先变到落後1比4。不过里昂并冇放弃，拿卡锡迪59分钟追番1粒，70分钟再由中坚洛夫云顶成3比4，拿卡锡迪82分钟完成帽子戏法追成4比4平手。得势不饶人嘅里昂最後阶段狂攻，补时阶段VAR介入判罚12码，拿卡锡迪喺第100分钟操刀射入，带领里昂反胜5比4完场。

两队球员喺同一场波食出「大四喜」，系法甲近49年来首次出现，拿卡锡迪再入4球後，喺法甲射手榜追平基利安麦巴比并列第1位(24球)，呢位前阿仙奴射手表示：「我一直相信(反胜)，因为一场比赛未到90分钟都仲未完结，我回归里昂就系要经历呢啲激情。」