西班牙中场布斯基斯周三(10日)宣布，今季後结束喺巴塞隆拿18年生涯，据报呢位34岁球星目前收到3份嚟自沙特阿拉伯嘅聘约，不过佢就唔想咁快作出决定，而系先等老友美斯决定向去，睇下有冇机会同「球王」再做队友。

布斯基斯今夏同巴塞隆拿约满，周三感人宣布唔会续约：「效力巴塞隆拿系一段神奇旅程，我自细已经梦想为巴塞效力。原来现实比梦想更加美好，如果当时你话我会为巴塞效力15年，我一定唔会相信。巴塞系我命中注定嘅球会，我永远支持巴塞。」

据报布斯基斯已收随希拉尔、艾纳斯同艾沙比3间沙特球会斟介，美职嘅国际迈亚密对佢亦好有兴趣，不过《马卡报》消息指，布斯基斯希望先等美斯决定去向，有传希拉尔会重金礼聘美斯加盟，布斯基斯希望可以同美斯再续前缘。