巴塞隆拿重夺西甲冠军後，虽然喺爱斯宾奴主场庆祝被「吓走」，不过周二(16日)返抵巴塞隆拿即举行胜利巡游，据报有超过8万球迷参加庆祝，期间朗奴阿拿奥祖更率领球迷一齐嗌「美斯、美斯...」继续声援巴塞签美斯回归嘅计划。

除咗巴塞赢西甲冠军外，巴塞女子队亦顺利喺女子联赛封后，男女队各自坐上巡游巴士接受球迷欢呼，期间乌拉圭中坚朗奴阿拿奥祖更带领球迷不断高呼「美斯」个名，显示球员同球迷都热烈期待呢位阿根廷球王回归。

其实巴塞击败爱斯宾奴封王後，美斯已经第1时间参与球队庆祝，朗奴阿拿奥祖赛後喺更衣室内开IG直播直击庆祝场面，势估唔到美斯突然加入直播，朗奴阿拿奥祖即惊喜表示：「边个嚟咗？美斯！天呀！」巴塞会长拉波塔喺周一(15日)亦公开表示，佢哋将不惜一切争取美斯回巢。