英超球会韦斯咸周五(19日)凌晨欧协联4强次回合，作客1比0击败阿尔克马尔，两回合合计赢3比1晋级，47年来首尝欧洲赛决赛滋味，不过今场光荣之战赛後出现混乱，部份荷兰激进球迷突然攻击客队球迷泄忿，目标更系看台上嘅球员家人、朋友，一众韦斯咸球员即刻冲去保护亲友，米查利安东尼奥等球员更冲上看台，场面混乱，好在最後冇球员受伤。

韦斯咸首回合主场领先2比1，今仗作客用反击制造唔少威胁，卢卡斯柏基达上半场曾劲射中柱；下半场阿尔克马尔仍然奋力进攻，可惜埋门质素欠奉，久攻不下更喺补时阶段输波，韦斯咸中场柏保路科奴斯中路个人突破，单刀射入全场唯一入球，带领韦斯咸自1976年欧洲盃赛冠军盃後，再度杀入欧战决赛，佢哋对手系意甲嘅费伦天拿。

完场後出现惊人画面，多名戴上黑色头套嘅激进球迷，突然冲去作客球迷看台进行袭击，而呢个看台正正系韦斯咸球员家人聚集嘅地方。韦斯咸职球员见到後即加入战团，总监麦克卢保同卢卡斯柏基达、艾朗加斯威尔等球员企图冲上看台，但保被球场保安制止，迪格兰赖斯同查洛保云亦同看台上嘅人发生争执，米查利安东尼奥同费恩唐尼斯更成功跨过围栏冲入看台，混乱最终由警察平息。

韦斯咸领队莫耶斯嘅年迈父亲亦身处看台，莫耶斯表示：「我唔知点解会发生咁嘅事，球员嘅反应系因为佢哋家人喺看台上面，我唔希望呢啲事掩盖球队光辉一夜。我嘅家人同朋友都喺看台，我只系希望佢哋及时逃走，保安员本来想拉我入更衣室，但我要先确保我嘅球员冇任何问题。」