卢顿童话式拎到英超参赛资格，今次升班确保球会得到1.8亿镑(约17.42亿港元)收入，不过卢顿今个夏天有唔少工作要做，除咗买人增强实力之外，更要喺12个星期内重建佢哋个超过100年历史嘅残旧主场，令佢符合英超嘅标准。

卢顿嘅凯尼沃斯路球场喺1905年兴建，容量系全超最少嘅10,356人，球场正门入口只系2道蓝色铁门，入场前仲要先穿过附近民居嘅後巷。据英国《每日邮报》消息，卢顿将斥资1,000万镑(约9,680万港元)进行部份重建，包括增设媒体中心、资料分析室、厕所、饭堂等等，泛光灯、座位等设备亦会更换，而且会赶喺休季嘅12个星期内完成。

卢顿本身阵容都非常平民，财力所限难以吸引明星球员，美国国脚门将艾芬贺华夫等主力都系借用加盟，不过今次升上英超後，或者有机会签到明星球员，领队罗拔艾华斯赛後更讲笑：「听闻尼马可以签到？」其实当地政府已通过，卢顿兴建一个全新球场，希望喺2026年启用，今次升班收入会有一大部份用作新球场资金。